លំនៅឋាន​ តម្លៃ​សមរម្យ ​លេច​ចេញ​ជា​រូបរាង ​តាម​រយៈ​វិនិយោគិន​ឯកជន​ ក្រោម​ការ​គាំទ្រ​ពី​រដ្ឋ

ទីបំផុត​គម្រោង​លំនៅ​ឋាន​សាធារណៈ​មាន​តម្លៃ​សមរម្យ​សម្រាប់​មហាជន​រួម​ទាំង​មន្ត្រី​រាជការ និង​ប្រជា​ពលរដ្ឋ​ដែល​មាន​ប្រាក់​ចំណូល​ទាប និង​មធ្យម​នៅ​ក្នុង​ប្រទេស​កម្ពុជា នឹង​លេច​ចេញ​ជា​រូបរាង​ហើយ​នៅ​ដើម​ឆ្នាំ​២០១៧​នេះ​តាម​រយៈ​កិច្ច​ខិតខំ​ប្រឹងប្រែង​ពី​វិនិយោគិន​ក្នុង​ស្រុក និង​ការ​ចូលរួម​គាំទ្រ​សហការ​ពី​រាជរដ្ឋាភិបាល​កម្ពុជា​។ បើ​តាម​ការ​ព្រាង​ទុក គម្រោង​នេះ​នឹង​ប្រកាស​លក់​នៅ​ក្នុង​រយៈពេល​ពីរ​សប្តាហ៍​ខាង​មុខ​នេះ​តទៅ​។

លោក​ឧកញ៉ា សៀ រិទ្ធី ប្រធាន​ក្រុម​ប្រឹក្សា​ភិបាល​ក្រុមហ៊ុន World Bridge Land បាន​ថ្លែង​នៅ​ក្នុង​ពិធី​សម្ពោធ​បើក​ការ​ដ្ឋាន​សាងសង់​លំនៅឋាន​សាធារណៈ​ដែល​មាន​តម្លៃ​សមរម្យ​នោះ​ថា​ ៖ «​គម្រោង​សំណង់​លំនៅឋាន​សាធារណៈ​មាន​លំនាំ​ជា​ផ្ទះ​ល្វែង​កូន​កាត់​ដែល​នឹង​ចាប់​ផ្តើម​សាងសង់​នា​ពេល​ដ៏​ខ្លី​ខាង​មុខ​នេះ គឺជា​សមិទ្ធផល​ថ្មី​មួយ​សម្រាប់​ឆ្នាំ​២០១៧ ដែល​បាន​កើត​ចេញ​ពី​ការ​យក​ចិត្ត​ទុក​ដាក់​ខ្ពស់​របស់​រាជរដ្ឋាភិបាល​កម្ពុជា បាន​គិត​គូរ​ដល់​ជីវភាព​រស់នៅ​របស់​មន្ត្រី​រាជការ និង​ប្រជា​ពលរដ្ឋ​ដែល​មាន​ប្រាក់​ចំណូល​ទាប ដើម្បី​ឲ្យ​ពួក​គាត់​មាន​លទ្ធភាព​ទទួល​បាន​លំនៅឋាន​រស់នៅ​សមរម្យ​ប្រកប​ដោយ​ផាសុកភាព​»​។

ដើម្បី​ធានា​បាន​ដល់​ការ​ផ្តល់​ជូន​នូវ​លំនៅឋាន​មាន​តម្លៃ​សមរម្យ​ទាំង​នេះ​ដល់​អតិថិជន លោក​ឧកញ៉ា សៀ រិទ្ធី បាន​ថ្លែង​ជា​សំណូម​ពរ​ទៅ​ដល់​រាជរដ្ឋាភិបាល​កម្ពុជា ថា ​៖ «​ក្រុមហ៊ុន​សុំ​ស្នើ​ឲ្យ​មាន​ការ​គាំទ្រ​ពី​រដ្ឋ​ដល់​ការ​លើក​លែង​ពន្ធអាករ​នានា ពន្ធ​លើ​ប្រាក់​បន្ថែម​ពន្ធ​ប្រថាប់​ត្រា ឧបករណ៍​បរិក្ខា គ្រឿង​ចក្រ គ្រឿង​សម្ភារ​សំណង់​សម្រាប់​ផ្គត់​ផ្គង់​នៅ​ក្នុង​គម្រោង​លំនៅឋាន​នេះ អចលនវត្ថុ និង​ពន្ធអាករ​លើ​តម្លៃ​បន្ថែម​ជាដើម​»​។

លោក​បាន​បន្តថា​ ៖ «[ក្រុមហ៊ុន​ក៏​សំណូម​ពរ​ឲ្យ​មាន​ការ​]​តភ្ជាប់​ហេដ្ឋា​រចនា​សម្ព័ន្ធ រួម​មាន​ប្រព័ន្ធ​ទឹក​ស្អាត ទឹក​កខ្វក់ ចរន្ត​អគ្គិសនី ប្រព័ន្ធ​លូ ប្រព័ន្ធ​ទូរគមនាគមន៍ និង​ការ​តភ្ជាប់​ផ្លូវ​ចូល​ទៅ​កាន់​តំបន់​អភិវឌ្ឍន៍​នេះ ជាដើម​»​។

«​គម្រោង​អភិវឌ្ឍន៍​លំនៅឋាន​សាធារណៈ​នេះ គឺជា​លំនៅឋាន​បែប​សហគមន៍ ដើម្បី​ផ្តល់​ការ​រស់នៅ​របស់​ប្រជា​ពលរដ្ឋ​[​នៅ​ទីនេះ​]​ប្រកប​ដោយ​គុណភាព សុវត្ថិភាព និង​សុខុមាលភាព​ក្នុង​ការ​រស់នៅ»។ នេះ​បើ​តាម​ប្រសាសន៍​របស់​លោក​ឧកញ៉ា រិទ្ធី។

​លោក​ពន្យល់​ថា គម្រោង​នេះ​ផ្តោត​ការ​យក​ចិត្ត​ដាក់​ជា​ចម្បង​ទៅ​លើ​មន្ត្រី​រាជការ​ដែល​រៀបការ​មាន​គ្រួសារ​រួច​ហើយ​តែ​ពួក​លោក​មាន​ប្រាក់​បៀវត្សរ៍​ទាប ខ្វះ​លទ្ធភាព​ទិញ​លំនៅឋាន​តាម​ទីផ្សារ​សេរី​។ បន្ទាប់​ពី​នោះ​គឺ​ក្រុម​គ្រួសារ​ពលរដ្ឋ​ដែល​មាន​ប្រាក់​ចំណូល​ទាប​ជាង​៥០០​ដុល្លារ​ក្នុង​មួយ​ខែ​។

ជំហាន​ដំបូង​នៃ​គម្រោង​លំនៅឋាន​សាធារណៈ​ដែល​មាន​តម្លៃ​សមរម្យ គឺ​ស្ថិត​នៅ​ក្រោម​កិច្ច​សហការ​រវាង​រាជរដ្ឋាភិបាល​កម្ពុជា និង​ក្រុមហ៊ុន World Bridge Land របស់​លោក​ឧកញ៉ា សៀ រិទ្ធី​។

គម្រោង​នេះ​នឹង​ចាប់​ផ្តើម​នៅ​លើ​ផ្ទៃដី​ទំហំ ២៤ ​ហិកតា នៃ​គម្រោង​ផ្ទៃដី​សរុប​ទំហំ​ចំនួន​៤៥​ហិកតា ស្ថិត​នៅ​ភូមិ​ទួល​ក្រសាំង សង្កាត់​រកា​ខ្ពស់ ស្រុក​ស្អាង ខេត្ត​កណ្តាល ដែល​មាន​ចម្ងាយ ៨​គ.ម ភាគ​ខាង​ត្បូង​ពី​ក្រុង​តាខ្មៅ​។

ដើម្បី​ផ្តល់​សុខុមាល​ភាព​ដល់​ប្រជា​ពលរដ្ឋ​ដែល​នឹង​ត្រូវ​រស់នៅ​ទីនេះ​តាម​គម្រោង​មេ ក្រុមហ៊ុន​គ្រោង​នឹង​បង្កើត​ឲ្យ​មាន​ផ្សារ​លក់​ដូរ ហាង​លក់​ទំនិញ គ្លីនិក មតេយ្យ​សាលា សួន​ច្បារ​សាធារណៈ និង​បង្កើត​ឲ្យ​​មាន​សេវា​ដឹក​ជញ្ជូន​ទៅ​តភ្ជាប់​ជាមួយ​សេវាកម្ម​ដឹក​ជញ្ជូន​សាធារណៈ​របស់​រដ្ឋ​នៅ​តំបន់​នោះ​ផង​ដែរ​។

តាម​ផែនការ «​ក្រុមហ៊ុន​គ្រោង​នឹង​សាង​សង់​ផ្ទះ​មាន​កម្ពស់​២​ជាន់ សរុប​ចំនួន​២២៩៧​ល្វែង ចែក​ចេញ​ជា​ពីរ​ប្រភេទ គឺ​ប្រភេទ​ទី​១ ផ្ទះ​ទំហំ ៤ ​គុណ ​៧ ​ម៉ែត្រ មាន​ចំនួន​ ២០២៥​ ល្វែង និង​ប្រភេទ ​ទី ២ មាន​ទំហំ ៦ ​គុណ​ ៧ ​ម៉ែត្រ មាន​ចំនួន ​២៧២​ ល្វែង​»។ នេះ​បើ​តាម​សម្តី​របស់​លោក​ឧកញ៉ា សៀ រិទ្ធី។

លោក ជា សុផារ៉ា ទេសរដ្ឋ​មន្ត្រី និង​ជា​រដ្ឋ​មន្ត្រី​ក្រសួង​រៀប​ចំ​ដែនដី នគរូបនីយកម្ម និង​សំណង់​បាន​ថ្លែង​នៅ​ចំពោះ​មុខ​មហាជន​ជាង ​៥០០ ​នាក់ ដែល​បាន​ចូល​រួម​នៅ​ក្នុង​ពិធី​នោះ​ថា​ ៖ «​ខ្ញុំ​រង់ចាំ​ថ្ងៃ​នេះ​ជា​យូរ​ឆ្នាំ​មក​ហើយ​។ ដោយ​បូក​រួម​នឹង​ទឹក​ចិត្ត​សប្បុរស​របស់​លោក​ឧកញ៉ា សៀ រិទ្ធី ដែល​បាន​គិត​គូរ​អំពី​ផល​ប្រយោជន៍​ខ្លួន​ឯង​ផង និង​ចង់​ជួយ​ចែក​រំលែក​ផល​ប្រយោជន៍​សម្រាប់​សង្គម​ជាតិ​​ផង​។ [​ទើប​ថ្ងៃ​នេះ​] ​យើង​អាច​បើក​ការដ្ឋាន​សង់​ផ្ទះ​ដែល​មាន​តម្លៃ​សមរម្យ​ឲ្យ​ស្រប​ទៅ​តាម​គោលនយោបាយ​លំនៅឋាន​របស់​រាជរដ្ឋាភិបាល​កម្ពុជា​»​។

លោក​បាន​បន្ត​ថា​ ៖ «​ផ្ទះ​តម្លៃ​២៤០០០ ឬ​ក៏​៣​ម៉ឺន​ដុល្លារ​ចុះ​ដែល​​មាន​ទំហំ​ធំ​។ ផ្ទះ​មាន​ទំហំ​៤​​គុណ​៧​ម៉ែត្រ គឺ​មាន​ចំនួន ២០២៥ ​​ល្វែង និង​ផ្ទះ​ទំហំ ៦​ គុណ ៧​ម៉ែត្រ មាន​ចំនួន ២៧២ ​ល្វែង»។

គណៈ​អធិបតី​បញ្ជា​គ្រឿង​ចក្រ​ជា​និមិត្ត​រូប​នៃ​ការ​ចាប់​ផ្តើម​ការ​សាងសង់។ រូបភាពៈ ស្រេង ម៉េងស៊្រុន

លោក​បន្ថែម​ថា​៖ «​យើង​ធ្វើ​យ៉ាង​ណា កុំ​ឲ្យ​​គេ​បង់​លើស​ពី​៨០​ដុល្លារ​ក្នុង​មួយ​ខែ គឺ​ឲ្យ​គាត់​បង់​គ្រប់​២០​ឆ្នាំ រហូត​បាន​ផ្ទះ​មួយ​»​។

លោក​រដ្ឋ​មន្ត្រី​បាន​អះអាង​ថា រាល់​ដំណើរ​ការ​បំពេញ​បែប​បទ​ឯក​សារ​នានា​សុំ​ទៅ​ក្រសួង និង​អាជ្ញាធរ​ពាក់ព័ន្ធ​នានា ដូចជា អាជ្ញាធរ​អគ្គិសនី អាជ្ញាធរ​មូល​ដ្ឋាន ក្រសួង​រ៉ែ និង​ថាមពល សម្រាប់​ការ​បូម​ខ្សាច់​យក​មក​ផ្គត់​ផ្គង់​ការ​ដ្ឋាន​សាងសង់​គម្រោង​នេះ​ជា​ដើម​នោះ ​«​ក្រសួង​រៀបចំ​ដែនដី​នឹង​ធ្វើ​លិខិត​អម​ភ្ជាប់​ជាមួយ​នឹង​សំណូមពរ ដើម្បី​ឲ្យ​ឧកញ៉ា សៀ រិទ្ធី នេះ គឺ​ចាត់​ការ​បាន​​ស្រួល​»​។

លោក​បន្ថែម​ថា​ ៖ «​ប៉ុន្តែ​ហាម​កុំ​ឲ្យ​ក្រុម​អ្នក​រត់​ការ​ឆ្លើយ​ដាក់​គ្នា​» ទាំង​ខាង​ក្រុម​ហ៊ុន និង​ខាង​ក្រសួង​។

បន្ថែម​លើស​ពី​នេះ​លោក​រដ្ឋ​មន្ត្រី​ក៏​បាន​ហាម​ប្រាម​កុំ​ឲ្យ​មាន​ការ​ជួញ​ដូរ​ផ្ទះ​នៅ​ក្នុង​គម្រោង​នេះ​ដោយ​បុគ្គល ឈ្មួញ ឬ​ក្រុម​បក្ស​ពួក ដើម្បី​កេង​យក​ចំណេញ​ផង​ដែរ ដោយ​លោក​សង្កត់​ធ្ងន់​ថា «​ផ្ទះ​ទាំង​នេះ​គឺ​សម្រាប់​តែ​មន្ត្រី​រាជការ កង​កម្លាំង​ប្រដាប់​អាវុធ និវត្តន៍​ជន ណា​ដែល​អត់​មាន​លំនៅ​ឋាន​ពិត​ប្រាកដ ឬ​ប្រជាជន​ក្រីក្រ​ប៉ុណ្ណោះ​»​។

លោក​ឧកញ៉ា សៀ រិទ្ធី បាន​ថ្លែង​ថា ​៖ «​គម្រោង​នេះ គឺ​សម្រាប់​ទុក​អាទិភាព​ឲ្យ​មន្ត្រី​រាជការ​មុន ប៉ុន្តែ​ទន្ទឹម​នឹង​នោះ យើង​ក៏មាន​ចំណែក​ខ្លះ​សម្រាប់​លក់​ឲ្យ​ប្រជា​ពលរដ្ឋ​ដែល​មាន​ចំណូល​ទាប និង​មធ្យម​ដូច​គ្នា គឺ​មិន​មែន​មាន​ន័យ ថា យើង​ទុក​តែ​លក់​ឲ្យ​មន្ត្រី​រាជ​ការ​នោះ​ទេ​»​។

លោក​ឧកញ៉ា សៀ រិទ្ធី ប្រធាន​ក្រុម​ប្រឹក្សា​ភិបាល​ក្រុមហ៊ុន ​World Bridge Land។ រូបភាពៈ ស្រេង ម៉េងស៊្រុន

លោក​បន្ត​ថា​ ៖ «​កាល ណា​យើង​និយាយ​ពី​ប្រជាជន គឺ​នរណា​ក៏​មាន​សិទ្ធិ​ទិញ​ផ្ទះ​នេះ​បាន ដែរ ប៉ុន្តែ​ត្រូវ​មាន​ចំណូល​ទាប ឬ​មធ្យម គឺ​ក្រោម​៥០០​ដុល្លារ​ក្នុង​មួយ​ខែ​»​។

​ពាក់ព័ន្ធ​ទៅ​នឹង​ឯកសារ​ផ្សេងៗ​ជា​លក្ខខណ្ឌ​ដើម្បី​ទិញ​បាន​ផ្ទះ​នៅ​ក្នុង​គម្រោង​នេះ «​គឺ​អ្នក​រៀបការ​មាន​ប្តី​-​ប្រពន្ធ​ហើយ​ជាការ​ស្រេច​។ បើ​គាត់​ជា​អ្នក​ធ្វើ​ការ​នៅ​តាម​ក្រុមហ៊ុន គឺ​ត្រូវ​មាន​លិខិត​បញ្ជាក់​ពី​ចំនួន​ប្រាក់​ខែ​របស់​គាត់​ពី​ក្រុមហ៊ុន ហើយ​ត្រូវ​តែ​ជា​បុគ្គល​ដែល​មាន​គ្រួសារ​ហើយ​។ នៅ​លីវ​គឺ​យើង​អត់​លក់​ជូន​បាន​ទេ​»។ នេះ​បើតាម​ការ​អះអាង​បញ្ជាក់​របស់​លោក​ឧកញ៉ា សៀ រិទ្ធី​។ «​ប្រសិន​បើ​មាន​អ្នក​ទិញ​ហើយ​គាត់​មិន​បាន​មក​រស់នៅ នោះ​គឺ​គាត់​អត់​អាច​យក​ទៅ​លក់ ឬ​ជួល​បាន​ទេ គឺ​លុះណា​តែ​៥ឆ្នាំ​ក្រោយ ទើប​គាត់​អាច​ជួល ឬ​លក់​បន្ត​បាន​»​។

លោក​ឧកញ៉ា​បាន​បន្ថែម​ថា លើសពី​ការ​ទិញ​ផ្ទះ​មាន​តម្លៃ​សមរម្យ​នេះ ក្រុមហ៊ុន ក៏​បាន​ពិភាក្សា​ជាមួយ​ដៃគូ​ធនាគារ​ឯក​ជន​នានា ដើម្បី​ផ្តល់​កម្ចី​មាន​ការ​ប្រាក់​ទាប​សម្រាប់​ការ​ទិញ​ផ្ទះ​នៅ​ក្នុង​គម្រោង​នេះ​ផង​ដែរ​។

អ្នក​ស្រី ជឹម សូវ៉ន វ័យ​ ៥៥​ឆ្នាំ ជា​គ្រូ​បង្រៀន​ចូល​និវត្តន៍ រស់​នៅ​ឯ​ភូមិ​ទួលសង្កែ សង្កាត់​ទួលសង្កែ ខណ្ឌ​ប្ញស្សីកែវ បាន​ព្យាយាម​ស្កាត់​ពី​ចុង​ក្រុង​ម្ខាង​ទៅ​ចូលរួម​នៅក្នុង​ពិធី​បើក​សម្ពោធ​ការដ្ឋាន​សាងសង់​​លំនៅឋាន​មាន​តម្លៃ​សមរម្យ​នេះ ក្នុង​បំណង​ទិញ​សម្រាប់ស្នាក់​នៅ​ជាមួយ​កូនៗ​របស់​ពួក​គាត់​។

​អ្នកស្រី​បន្តថា គាត់​បានដឹង​ព័ត៌មាន​នេះ​យូរ​ដែរ​ហើយ ប៉ុន្តែ​ពុំ​ដឹង​ទីតាំង​ច្បាស់លាស់​ទេ​។ «​គាត់​[​លោក​ឧកញ៉ា​]​ថា ៨​គ.ម ពី​ក្រុង​តាខ្មៅ គិត​ទៅ​១៨​គ.ម ពី​វិមាន​ឯករាជ្យ [​ខ្ញុំ​]​គិតថា​វា​មិន​អី​ទេ​»។ នេះ​បើ​តាម​សម្តី​របស់​អ្នក​ស្រី សូវ៉ន​៕

ប្រភពៈ postkhmer

អគ្គលេខាធិការ CDC: កម្ពុជាជាប់ជាប្រទេស​ក្នុងចំណោម​ប្រទេស​ទាំង៨​ក្នុងពិភពលោក មាន​សេដ្ឋកិច្ច​រីកចម្រើន​រហ័ស និងរឹងមាំ មានអត្រា៧.៧% រយៈពេល២០ឆ្នាំ ក្លាយជាខ្លាថ្មីនៅអាសុី !
ជី សិលា៖ “សិស្ស IT ពូកែ​សរសេរ​កូដ តែ​នៅ​ខ្វះ​ឥរិយាបថ​មួយ”
លោក​សម រង្ស៊ី​គាំទ្រ​ការទម្លាក់​អត្រា​ការប្រាក់​១៨% តែ​ស្នើ​ឲ្យ​គិតគូ​បន្ថែម​លើ​ទីផ្សារ​កសិកម្ម​
លោក​សម រង្ស៊ី​​ជាប់ឆ្នោត​ជា​​អនុប្រធាន​​នៃ​អង្គការ​​សេរីនិយម​​អន្តរជាតិ​​
ក្រុមហ៊ុន ​Alibaba បន្ថែមទុន $488 Million សម្រាប់គម្រោងអាហារសុខភាព​ ទៅលើ Ali Health របស់ខ្លួន
អ្នកនយោបាយ​បារាំង​ម្នាក់ ចំអក​លោក ម៉ា​ក្រុង ថា មាន​ឥរិយាបថដូច «​ខ្មែរ​»
បើអញ្ចឹងមែននោះ​!! ក្រុមហ៊ុន Samsung ពិតជាបារម្ភ
CNN ៖ អាមេរិក​បានកំណត់​​ យកខែឧសភា ខាងមុខនេះ​ជា​ថ្ងៃ​បើក​ការវាយប្រហារ​ទៅ​លើ​កូរ៉េខាងជើង​
Microsoft Surface Pro លេចជារូបរាងហើយ
Apple បង្ហាញ​តិចនិក​ថត​រូប​ស្អាត​​លើ iPhone 7 Plus ឥត​គិត​លុយ​ទៀត​ហើយ​
ជី សិលា៖ “សិស្ស IT ពូកែ​សរសេរ​កូដ តែ​នៅ​ខ្វះ​ឥរិយាបថ​មួយ”
សហគ្រិនស្រ្តីវ័យ២៨ឆ្នាំ៖ខ្ញុំឈឺចាប់ខ្លាំង ពេលឃើញគេមើលងាយស្ទើរគ្រប់ផលិតផលខ្មែរ
Apple បង្ហាញ​តិចនិក​ថត​រូប​ស្អាត​​លើ iPhone 7 Plus ឥត​គិត​លុយ​ទៀត​ហើយ​
កញ្ញា ឡូ​រ៉ា ម៉ម ៖ ​ខ្ញុំ​ឈឺចិត្ត ខ្ញុំ​ចង់​ឲ្យ​ទាំងអស់គ្នា​ដឹងថា ខ្ញុំ​ជា​កូន​ខ្មែរ មាន​ឪពុកម្ដាយ​ខ្មែរ ប៉ុន្តែ​ទាំងអស់គ្នា​ហៅ​កូនកាត់​រហូត ព្រោះ​តែ…
ច្បាស់​ហើយ​ស្ត្រី​ម្នាក់​ស្លៀក​ម៉ៃ​យ៉ូ​ដឹក​ដៃ​កូន​មុជទឹក​សមុទ្រ​ដែលបង្ក​ការរិះគន់​ពេញ​ហ្វេ​ស​ប៊ុ​ក​នោះគឺ…
សារមន្ទីរសម័យទំនើបមួយនៅកូរ៉េ ពិតជាប្លែកនិងគួរអោយចង់ទៅលេង
Apple បង្ហាញ​តិចនិក​ថត​រូប​ស្អាត​​លើ iPhone 7 Plus ឥត​គិត​លុយ​ទៀត​ហើយ​
ទូរស័ព្ទ iPhone 8 នឹងធ្វើឲ្យអតិថិជនរបស់ខ្លួនមានការភ្ញាក់ផ្អើល ដោយមុខងារថ្មីៗមិនគួរឲ្យជឿ
ចេញ​ថ្មី​ដងខ្លួន​ទន់ល្មើយ អភិវឌ្ឍ​កាន់តែ​ដូច​មនុស្ស​ពិត​ៗ (វីដេអូ)
លោកស្រី Angelina Jolie បានព្រមានអាមេរិក អំពីជាតិនិយម ទាំងក្នុង និងនៅបរទេស