កាលពីថ្ងៃចន្ទ ដើមសប្ដាហ៍នេះ Sabay បានផ្សាយពីរឿងមានក្រុមហ៊ុនមួយធានាចេញថ្លៃសំបុត្រឡានក្រុង ពេលចូលឆ្នាំខ្មែរ ហើយថ្ងៃនេះ Sabay ក៏ទទួលបានព័ត៌មានបន្ថែមទៀតពីទិសដៅដែលឡានក្រុងទាំង ១០០ គ្រឿងនេះ ត្រូវធ្វើដំណើរទៅ។
កម្មវិធីចាយលុយរាប់ម៉ឺនដុល្លារមួយនេះ មានឈ្មោះថា GANZBERG UBER BUS ដែលរៀបចំដោយ Ganzberg។ សំបុត្រ ៥០០០ សន្លឹក នឹងចែកឲ្យដោយឥតគិតថ្លៃ ដល់អ្នកនៅភ្នំពេញដែលត្រូវទៅលេងស្រុកកំណើតនៅខេត្ត ឱកាសចូលឆ្នាំខ្មែរ។ ខេត្តក្រុងទាំង ១៤ ដែលជាទិសដៅចេញពីភ្នំពេញ មាន៖
- សៀមរាប
- បាត់ដំបង
- ព្រះសីហនុ
- កំពត
- កំពង់ធំ
- ពោធិ៍សាត់
- កំពង់ឆ្នាំង
- បន្ទាយមានជ័យ
- កំពង់ចាម
- ត្បូងឃ្មុំ
- តាកែវ
- ក្រចេះ
- ស្វាយរៀង
- ព្រៃវែង
ការផ្ដល់សំបុត្រឡានក្រុងដោយឥតគិតថ្លៃនេះ គឺដើម្បីជួយកាត់បន្ថយការចំណាយប្រជាពលរដ្ឋ ជាពិសេស និស្សិត និងកម្មករ-កម្មការិនី ដែលត្រូវលេងស្រុកកំណើតជួបជុំគ្រួសារ ក្នុងឱកាសចូលឆ្នាំខ្មែរ និងដើម្បីទប់ស្កាត់ការឡើងថ្លៃសំបុត្រឡានក្រុងផងដែរ។ នេះបើតាមការអះអាងរបស់តំណាងក្រុមហ៊ុន Ganzberg។
ឡានក្រុងទាំង ១០០ គ្រឿងនឹងចេញដំណើរព្រមៗគ្នាតែម្ដងនៅម៉ោង ៩ ព្រឹក ថ្ងៃទី១២ មេសា ដោយចេញពីកោះពេជ្រ រាជធានីភ្នំពេញ។ អ្នកចង់បានសំបុត្រទៅខេត្តក្រុងទាំង ១៤ នេះ អាចទៅយកពីស្តង់ GANZBERG UBER BUS នៅកោះពេជ្រដោយឥតគិតថ្លៃបាន ចាប់ពីថ្ងៃទី៨ មេសា ម៉ោង ៨ ព្រឹក រហូតដល់ចែករហូតអស់សំបុត្រ៕
ប្រភពៈ sabaynews
